गुढीपाडव्याच्या शुभमुहूर्तावर करा गृहप्रवेश...!

• 09 APR 2021

नवीन घर बांधल्यावर त्यात राहायला जाण्यापूर्वी आपल्याला मुहूर्त पाहावा लागतो. भारतीय संस्कृतीत मुहूर्ताला खूप महत्त्व असून मुहूर्तावर नवीन व्यवसाय, नवीन खरेदी किंवा नवे घर, वाहन, सोने खरेदी करणे अशा अनेक गोष्टी केल्या जातात. गुढीपाडवा, अक्षयतृतीया आणि विजयादशमी हे पूर्ण मुहूर्त आहेत, तर दीपावली पाडवा हा अर्धा मुहूर्त मानला जातो. संपूर्ण वर्षभरातल्या या साडेतीन मुहूर्तांना भारतीय संस्कृतीत खूप महत्त्व आहे. प्रॉपर्टी खरेदी करताना किंवा नवीन घरात प्रवेश करण्याच्या बाबतीत आपण भारतीय सामान्यत: शुभमुहूर्तांबद्दल विशेष आग्रही असतो. त्यामागे असा विश्वास आहे की, शुभ दिवशी गृहप्रवेश केल्याने भाग्य उजळते.

प्रथमच एखाद्या नवीन घरात प्रवेश केल्यावर एक गृहप्रवेश सोहळा पार पाडला जातो. वास्तुशास्त्र व ज्योतिष तज्ज्ञ यांच्या मते, संपूर्ण कुटुंबासाठी हे महत्वाचे आहे. असे म्हणतात की, घर पाच घटकांपासून बनलेले आहे - सूर्य, पृथ्वी, पाणी, अग्नी आणि वायू आणि घरात या घटकांचे योग्य संतुलन आनंद, आरोग्य आणि समृद्धी आणते. असा विश्वास आहे की, एखाद्या शुभमुहूर्तावर घरात प्रवेश करणे जीवन सुकर बनवते. नवीन घरात गेल्यानंतर कुटुंबाला प्रत्येक गोष्टीत यश प्राप्त होईल. अशा मुहूर्तांना अनुकूल असणाऱ्या दिवसांपैकी एक म्हणजे गुढीपाडवा. या दिवसाचा प्रत्येक क्षण शुभ मानला जातो.

गृहप्रवेश करण्यापूर्वी मनोभावे कलशपूजन केले जाते. या विधीसाठी, तांब्याचे भांडे पाण्याने भरतात. त्यात नऊ प्रकारचे धान्य आणि एक नाणे ठेवण्यात येते. भांड्यावर एक नारळ ठेवला जातो. त्यासोबतच वेदशास्त्रसंपन्न गुरुजींच्या मार्गदर्शनाखाली मंत्रोच्चार करून पूजा करण्यात येते. या दिवशी आपल्या पूर्वजांचे स्मरण करणे आणि त्यांचे आशीर्वाद लाभावेत, या दृष्टीनेही महत्त्व असल्याने कलशपूजन करून गृहप्रवेश केला जातो.

गृहप्रवेश करताना...

गृहप्रवेश त्यावेळेसच केला पाहिजे, जेव्हा नवीन घर शिफ्ट होण्यासाठी व राहायला तयार असेल. घराचे बांधकाम पूर्ण झालेले पाहिजे. ते पेंट केले पाहिजे. दरवाजे, खिडक्या आणि इतर फिटिंग्जसुद्धा पूर्ण असाव्यात, असे वास्तुतज्ज्ञ म्हणतात मुख्य प्रवेशद्वार, जे घरात समृद्धी आणि चांगल्या स्पंदनांचा प्रवेशबिंदू आहे, अशा उंबरठ्यावर काढलेले स्वस्तिक आणि माता लक्ष्मीची पाऊले शुभचिन्हे आहेत. आंब्याची हिरवीगार पाने आणि झेंडूच्या फुलांनी बनविलेले तोरण दरवाजावर लावले पाहिजे. जागा शुद्ध करण्यासाठी, नकारात्मक शक्तींना नष्ट करण्यासाठी सहसा होमहवन आयोजित केले जाते. गणेश पूजा, नवग्रह शांती, म्हणजे नऊ ग्रहांची उपासना आणि वास्तुपूजा केली जाते. या दिवशी आमंत्रित केलेल्या कुटुंबीयांना आणि मित्रांनाही भोजन द्यावे. हे सर्व विधी व कार्यक्रम पार पडल्यानंतर आपण नवीन घरात राहायला जाऊ शकता.